香港人向來眉精眼企，講求平、靚、正係日常消費嘅基本原則。然而着眼於實踐社會使命，如改善弱勢社群處境嘅社會企業（社企），其產品或服務嘅性價比一般較低，通常係市民認同背後嘅價值理念先至會幫襯，喺市場競爭激烈之下，經營社企有無前景呢？近日舉行嘅「第十三屆社企民間高峰會」，就雲集一眾社創領軍人物，當中「十一良心消費運動」項目經理何卓蕙（Maisy）就講到，良心消費係絕對有得做，全因近年社企產品同服務愈出愈多，已囊括我哋整個日常生活。

何卓蕙認為近年社企產品愈出愈多，市民多咗好多選擇。（溫國佳攝）

Maisy解釋，現時社企有別於十年前。香港過往嘅社企同經營嘅項目都相當有限，但隨着時代一路進步，社企嘅產品同服務與日俱增，以致生活起居所需嘅柴米油鹽、理髮服務都有，加上認同社企經營理念嘅市民日漸增多，亦進一步推動良心消費。講到點樣令市民多啲幫襯社企，Maisy就話要畀巿民大眾聽多啲、接觸多啲社企概念，又或者推動線上銷售，利用Facebook等網上平台讓市民多加了解，另外就係發展購物獎賞計劃，市民儲印花換產品，以促進社企圈內嘅消費活動。

陸樺：本地有機耕種 疫下銷情好

好單位「Good Lab」行政總裁陸樺（Warren） 及香港社會創投基金項目總監蔡展輝（Steven）都喺現場。Warren就話公司屬於非牟利機構，過去都有以顧問形式幫助年輕人設立社企，譬如提供培訓等。而Steven同樣認為良心消費有得做，特別喺疫情下，佢留意到本地有機耕種，即食湯包等社企產品都有唔錯嘅銷量。

蔡展輝（左）及陸樺（右）同樣認為良心消費有得做，係未來趨勢。

黃皜翹（左）喺疫情期間開創補習平台幫助有需要嘅小朋友。右為容蔡美碧。

會上除咗籌委會主席容蔡美碧外，年僅十二歲「同享童分」創辦人黃皜翹（Chloe）同樣有出席。Chloe把握疫情呢段時間，開創另類社企。佢話疫情令學校停課，學生需要在家學習，但唔少基層小朋友都遇到困難，佢哋可能因為家庭因素，父母無法教導佢哋做功課，於是就與同校三位夥伴創立平台，開Zoom教人做功課溫習，後來有好多人加入佢哋嘅行列，至今已有廿三個小老師，橫跨十四間中小學，佢希望未來可以幫到更多有需要嘅人。

卓妮